Телефон поддержки: 88002501338 Email: book@bichik.ru

Иван Мигалкин: Кинигэни кытта доҕордоспут киһи өлөн-охтон биэрбэт

«Бичик» кинигэ кыһата уонна Ньурба улууһун салалтата “Көмүс күһүн” диэн кинигэ уонна литература бэстибээлин олус айымньылаахтык тэрийэн ыыттылар. Мин санаабар, тэрээһиннэр үрдүк таһымнаахтык аастылар. Ньурбаттан тахсыбыт суруйааччылар олорбут сирдэринэн, суруналыыс, суруйааччы Степан Федотов төрөөбүт-үөскээбит Дьиикимдэтинэн, саха биир бастакы поэтессата Варя Потапова – үүммүт Убайаанынан, поэт Николай Харитонов-Чуорга анаммыт “Таптал» скверынан сырыттыбыт. Бу тэрээһин уратыта диэн – олохтоохтор барытыгар эрдэттэн бэлэмнэнэн, кинигэни таптыылларын, ааҕалларын бэлиэтинэн актыыбынайдык кыттыылара буолар.

 

Биһигини тиийээппитин кытта култуура департаменын салайааччыта Розалия Тихонова, баһылыгы социальнай үлэҕэ солбуйааччы Анна Уларова, маны тэҥэ улуус салалтатын баһылыга Алексей Иннокентьев көрсөн, тэрээһиннэри көхтөөхтүк тэрийдилэр. Уһулуччулаах государственнай, общественнай деятель Семен Сүүлүскэй төрөөбүтэ 110 сылын бэлиэтээһиҥҥэ, кини олоҕун, үлэтин көрдөрөр дириҥ ис хоһоонноох матырыйааллары, экспонаттары Олоҥхо дьиэтигэр, олохтоох Ксенофонт Уткин аатынан музей директора Анна Туманова, Борис Борисов көрдөрдүлэр. Уопсайынан, бу маннык улуустарга «Бичик” ыытар, эбэтэр кыттар тэрээһиннэрэ өрүү сэргэхтик бараллар. Ону мин суруйааччы хараҕынан көрдөхпүнэ бу нэһилиэнньэҕэ билигин кинигэни аахпат кэмҥэ, бичиктэр маннык үлэлэһэн, улуустарынан сылдьан саха ааҕаччытыгар литература суолтатын, кинигэни кытта доҕордоспут киһи өлөн-охтон биэрбэтин туһунан сырдатан үлэ ыыталлара хайҕабыллаах. Уонна бу кэмнэргэ кинигэ кыһата таһаарбыт бородууксуйатын олохтоохтор хамаҕаттык атыыластылар. Бу буолар — киһи, кинигэ уонна үйэлээх доҕордоһуу, үйэлээх чиҥ билии төрдүнэн-төрүөтүнэн. Маны таһынан этиэм этэ: тэрээһиннэр барыта лоп курдук чааһынан, биир тэҥнээхтик ыытыллан истилэр. Өрөспүүбүлүкэ оһуохайга Дархан этээччитэ Розалия Тихонованы сатабыллаах салайааччы быһыытынан көрдүм, кини ыытар буолла да хайаан даҕаны барыта лоп-бааччы буолар. Хас улуус аайы сорох кыаллыбат итэҕэстэр син биир баар буолаллар. Онтон кини ылсыһан, тэрийбит дьаһаллара барыта санаа хоту наһаа үчүгэйдик, тэрээһиннээхтик баран иһэллэр.

Мин ийэм аҕата Ньурба буолан быһыыта, бу ыраах айаннарга олус сэргэхтик сырыттым. Өрүү Чомууттартан хаан тардар улууһум — эһэм дойдута буолар. Бэйэтин үтүө айылҕатынан мэлдьи араҥаччылыыр курдук.

Newer
Евдокия Иринцеева: Кэнэҕэскитин “поэтические посиделки” диэн семинар наада
Older
Август Егоров: Ньурба дьоно-сэргэтэ ааҕыыга, литератураҕа, кинигэҕэ сүрдээх чугастарын көрдүбүт
Shopping cart