«Мин маҥнайгы тапталым» уус-уран суруйууга литературнай куонкурус түмүктэннэ

Семен Андреевич Новгородов аатынан «Бичик» кыһата edersaas.ru сайты кытары бу сыл олунньу 14 күнүттэн — тапталлаахтар күннэриттэн атырдьах ыйыгар диэри айар талааннаах, суруйар дьоҕурдаах дьоҥҥо анаан үйэлээх таптал киһиэхэ истиҥ иэйиини саҕарын, сүргэни көтөҕөрүн, эдэри-эмэни үрдүккэ сирдиирин, сырдыкка-кэрэҕэ угуйарын, мөлтөҕү күүһүрдэрин, кыамматы туруорарын, олоххо тапталы, дьоҥҥо эрэли бөҕөргөтөрүн сырдатар сыаллаах-соруктаах уус-уран суруйууга куонкурус биллэрбиппит. Балаһыанньата хаһыаттарга, Эдэр саас сайтыгар уонна социальнай ситимнэринэн тарҕаммыта. Куонкуруска эрдэ бэчээттэммэтэх, дьон киэҥ араҥатыгар биллибэтэх айымньылар көрүлүннүлэр.

Айымньы ис хоһооно үйэлээх тапталы өрө тутар, тапталга сүгүрүйэр, истиҥ санааны тиэрдэр буолуохтаах, эдэр ыччакка холобур буолар, чугас киһини харыстыыр, сыаналыыр өйдөбүлү биэриэхтээх.

Сунтаар, Таатта, Бүлүү, Амма, Верхоянскай, Мирнэй, Кэбээйи, Хаҥалас, Уус Алдан, Мэҥэ Хаҥалас, о.д.а. улуустартан уонна Дьокуускай куораттан барыта 25 үлэ киирдэ. Оскуола оҕотуттан саҕалаан бочуоттаах сынньалаҥҥа олорор айар дьоҕурдаах дьоҥҥо тиийэ кытыннылар.

Дьүүллүүр сүбэҕэ «Күрүлгэн» уус-уран сурунаал сүрүн эрэдээктэрэ, суруйааччылар сойуустарын норуоттар икки ардыларынааҕы түмсүүтүн, Саха Өрөспүүбүлүкэтин  суруйааччыларын уонна РФ Суруналыыстарын сойуустарын чилиэнэ, Саха норуодунай поэта Иван Гоголев-Кындыл аатынан бириэмийэ лауреата, хас да кинигэ ааптара Афанасий Гаврильевич Гуринов-Арчылан, «Кэскил» уонна «Юность Севера» хаһыаттар сүрүн эрэдээктэрдэрэ, РФ суруйааччыларын уонна суруналыыстарын сойуустарын чилиэнэ, Саха өрөспүүбүлүкэтин култууратын үтүөлээх үлэһитэ, хас да кинигэ ааптара Евдокия Семеновна Иринцеева-Огдо, «Бичик» кинигэ кыһатын сүрүннүүр эрэдээктэрэ, Саха өрөспүүбүлүкэтин култууратын үтүөлээх үлэһитэ, РФ суруналыыстарын уонна түүр омук литератордарын сойуустарын чилиэнэ, хас да кинигэ ааптара Валерий Николаевич Луковцев уонна «Бичик» кинигэ кыһатын ааҕааччы киэҥ араҥатыгар туһуламмыт эрэдээксийэ үлэһиттэрэ киирдилэр.

Унньуктаах көрүү, дьүүллэһии кэнниттэн үс бастыҥ айымньыны уонна биэс биһирэнэр үлэни таллылар. Бэлиэтэммит үлэлэр, ону таһынан талыллыбыт айымньылар хомуурунньукка киириэхтэрэ.

Үс бастыҥ айымньы:

 

• «Тыын» кэпсээн, ааптар Марфа Иннокентьевна Иванова
• «Тапталы харыстыах» кэпсээн, ааптар Екатерина Прокопьевна Михайлова
• «Үйэлээх таптал» кэпсээн, ааптар Лукачевский Иннокентий Дмитриевич-Силис

 

 

Биэс биһирэнэр айымньы:

 

— «Чүмэчи —  урукку-хойукку санаалар ситимнэрэ» кэпсээн, ааптар Клара Борисовна Ксенофонтова-Барахсаана

— «Ийэм олоҕун кэпсээнэ», ааптар Иванова Антонида Николаевна-Кыыдаана

— «Баар эбээт, маҥнайгы таптал!» кэпсээн, ааптар Светлана Николаевна Самсонова-Сиибиктэ

— «Хааннаах платок» кэпсээн, ааптар Петр Константинович Шапов

    — «Кыыс аата» кэпсээн, ааптар Анатолий Игнатьевич Слепцов

«Мин маҥнайгы тапталым» куонкурус бары кыттыылаахтарыгар барҕа махталбытын этэбит уонна сертификат биэрэбит. Талыллыбыт айымньылар хомуурунньукка бэчээттэниэхтэрэ.

Аадырыспыт: Дьокуускай к., Курашов уул. 30/1, 104 каб. Төл.: 44-42-06, 89142701195