«Саха сиринээҕи Бэчээт тиэргэнэ-2015» IX регионнар икки ардыларынааҕы быыстапка-дьаарбаҥка түмүктэнэр кэмин үгүс киһи эрэнэ-долгуйа күүттэ. Бу дьаарбаҥкаҕа хас да кинигэ, учебник биһирэмин, тыа сиригэр кинигэни тарҕатыы кыһалҕаларыгар төгүрүк остуолу, биһиги кэммит суруйааччыларын кытта автограф-сессия тэрийэн ыыппыт «Бичик» Национальнай кинигэ кыһата бу да сырыыга саамай элбэх дипломҥа тигистэ.
Кыһыл көмүс мэтээлинэн уонна I степеннээх Дипломунан «Мир Саха: народное искусство» альбом, «Хамсыыр харамай» оҕолорго интерактивнай кинигэ наҕараадаланна. II степеннээх Дипломунан «Оҕону сайыннарар кинигэ», «Детям Севера», «Я – настоящий человек» чукча тылынан алын кылаас оскуола оҕолоругар ааҕыы кинигэтэ, 1-4 кылаастарга «Литература ааҕыыта» электроннай учебник, Мандар Уус «Моҕол ураһа»; III степеннээх Дипломунан «История чурапчинского переселения. Документы. Цифры. Факты», «Любимые сказки народов России» бэлиэтэннилэр. «Бастыҥ дизайн уонна киэргэтии» түһүмэххэ Анал Диплому быйыл саха бэчээтин сэргэхсиппит уонна соһуппут «Эдьиий» кинигэтэ ылла.
Итинник араас быыстапка, тэрээһин кэнниттэн уонунан Диплом, мэтээл кэлбитин иһин, саамай күндү наҕараада – ааҕааччы билиниитэ, кини сэргээн, кэрэхсээн атыылаһар кинигэлэрэ сыралаах үлэ түмүгүн кэрэһилииллэр уонна сарсыҥҥы үлэҕэ кынаттыыллар.
Марианна Тыртыкова
|