Дойду тэбэр сүрэҕэр, Москва куоракка Бэчээккэ уонна маассабай коммуникацияҕа Федеральнай агентство ыытар «Сыл бастыҥ кинигэтэ» диэн Национальнай күрэҕэр «Бичик» кыһа 1-4 кылаастарга таһаарбыт «Литература ааҕыыта» үөрэх-методическэй кэмпилиэгэ «XXI үйэ учебнига» түһүмэххэ кыайбыта сахабыт дьонугар үрдүк үөрүүнү, киэн туттууну аҕалла.
Бүтүн Россия үрдүнэн саамай бастыҥ диэн билиниллибит учебнигы билиһиннэрэ «Саха сиринээҕи Бэчээт тиэргэнэ-2015» IX регионнар икки ардыларынааҕы быыстапка-дьаарбаҥка иккис күнүгэр үөрэх үлэһиттэрэ, төрөппүттэр Өрөспүүбүлүкэтээҕи медиа-кииҥҥэ муһуннулар. Кыһа дириэктэрэ Август Егоров тыл этэригэр:
-- Быйыл бу күрэххэ дойду бары муннугуттан уонна национальнай республикалартан 120 кыһа 600 үлэтин дьүүллүүр сүбэ көрбүтэ. Билигин ФГОС диэн саҥа үөрэх ирдэбилэнэн, учебник хайаан да электроннай көрүҥнээх буолуохтаах. Онон, бу ирдэбили толорорго үөрэх уонна оҕо кинигэтин таһаарар редакция Марина Макеева салалтатынан күүскэ үлэлээтэ. СӨ Үөрэҕин министиэристибэтин, ааптардары кытта өр кэмнээх таһаарыылаах үлэбит түмүгэ итинник үрдүктүк сыаналаммыта барыбыт ситиһиибит буолар. Учебникпыт барыта түөрт: үс федеральнай уонна региональнай экспертизаны ааста.
Мин билиҥҥи оҕолорго ымсыыра саныыбын. Учебникка аудио, видео барыта баар. Үөрэнээччи ону тэҥэ электроннай учебникка төһө баҕарар бэлиэтэнэр, уруһуйдуур, сотторор, эбии матырыйаалы ааҕар, истэр кыахтанна. Тиэкискэ билбэт тылын баттаатаҕына, тута бу тыл быһаарыыта көстөр, тургутукка эппиэттээн бэйэтин билиитин бэрэбиэркэлэнэр, о.д.а. сонун көстүү элбэх. Учебник элбэх дьэрэкээн ойуута-бичигэ, тыаһа-ууһа барыта оҕо болҕомтотун тардар, төрөөбүт литературатын сэргээн ааҕарын курдук оҥоһулунна. Онон бу электроннай цифровой үйэҕэ дьоллоох оҕолор маннык учебнигынан үөрэниэхтэрэ.
Саха литературатын, төрүт үгэстэрин, бэйэбит культурабытын үйэтитэр, кэнчээри ыччакка тиэрдэр туһугар бу учебник күн сирин көрдө. Учебник электроннай көрүҥүн бэйэбит сахабыт уолаттара сатыахтара диэн Иннокентий Антонов, Станислав Дьячковскай салайааччылардаах «EcoNordIT» тэрилтэни кытта үлэлэспиппит ситиһиилээх, кыайыылаах буолла! – диэн үөрүүтүн үллэһиннэ.
СӨ Үөрэҕин министиэристибэтин уопсай үөрэхтээһин салаатын салайааччыта Наталья Ситникова:
-- Наҕараада ылыы – уопсай үлэбит түмүгэ. Билигин 1-4 кылаастарга «Төрөөбүт тыл», 5-9 кылаастарга «Төрөөбүт литература» учебниктарын оҥоро сылдьабыт. Бу учебниктары «Бичик» кыһа Үөрэх кинигэлэрин федеральнай испииһэгэр киллэрэр сыаллаах үлэни ыытар, -- диэн билиһиннэрдэ.
«Литература ааҕыыта» үөрэх кэмпилиэгэ ааҕыыга аналлаах «Ыалынан ааҕыы», «Бэйэ ааҕыыта» уонна учууталга көмө босуобуйалардаах. Дойду үрдүнэн 22 национальнай регионтан Татарстан, Сахабыт сирэ уонна Хакасия эрэ төрөөбүт тылларын, литератураларын учебниктарын федеральнай испииһэккэ киллэрдилэр.
Бу учебнигы оҥорорго 20 тахса худуоһунньук үлэлээтэ, электроннай көрүҥҥэ матырыйааллары бэлэмнээһиҥҥэ Дьокуускай куораттан Национальнай гимназия, 17 №-дээх оскуола, Нам Хамаҕатта, Хатыҥ-Арыы орто оскуолаларын учууталлара көмөлөстүлэр.
Улахан экраҥҥа электроннай учебнигы арыйталаан, хайдах туһанылларын көрдөрдүлэр, үөрэнээччилэр планшекка тэҥҥэ үлэлээн биһирээтилэр. Манна мустубут учууталлар, устудьуоннар, үөрэнээччилэр, төрөппүттэр санааларын үллэстэллэригэр «оҕо сэргиир, кэрэхсиир, чахчы да 21 үйэ учебнига тахсыбыт» диэн үрдүк сыанабылы биэрдилэр.
Марианна Тыртыкова
