Сыл ахсын Владивосток куоракка Уһук Илин эргимтэҕэ кинигэ таһаарааччылар бары мустан, бастыҥнары бэлиэтиир, аныгы кинигэ таһаарыытын, полиграфическай технология бүтэһик ситиһиилэрин көрөр-истэр, уопут атастаһар үтүө үгэстээхтэр. Быйыл балаҕан ыйын 23-25 күннэригэр XVIII төгүлүн ыытыллар «Бэчээт тиэргэнэ-2015» быыстапка-дьаарбаҥкаҕа «Сыл кинигэтэ» күрэххэ хас да түһүмэҕинэн уопсайа 80 тахса кыһа тыһыынчанан талыллыбыт кинигэтэ дьүүллүүр сүбэ болҕомтотугар киирдэ.
Сахабыт сириттэн бу быыстапкаҕа «Бичик» дойду үрдүнэн биир бастыҥ кыһа диэн өрө тутуллан, өрүү инники күөҥҥэ сылдьар. Биир идэлээхтэр ортолоругар билинии уонна ытыктабыл бэлиэтинэн быыстапка үөрүүлээх аһыллыытыгар үс киһи тыл эппититтэн, ол иһигэр эҕэрдэ тылы «Бичик» кыһа дириэктэригэр Август Егоровка биэрдилэр. Москва куоракка бу аҕыйах хонуктааҕыта Бэчээккэ уонна маассабай коммуникацияҕа Федеральнай агентство ыытар «Сыл бастыҥ кинигэтэ» диэн Национальнай күрэҕэр «Бичик» кыһа 1-4 кылаастарга таһаарбыт «Литература ааҕыыта» үөрэх-методическэй кэмпилиэгэ «XXI үйэ учебнига» түһүмэххэ кыайбытын истэннэр, электроннай учебник оҥорорго мастер-кылаас биэрэргэ көрдөстүлэр. Үс күннээх быыстапка кэмигэр төгүрүк остуоллар ыытыллан, киэҥ далааһыннаах кэпсэтии таҕыста. Манна бэл үрүҥ күн ойон тахсар дойдутуттан Японияттан кытта кэлбиттэр, дьоппуон суруйааччыларын сахалыы таһаарыаххыт дуо диэн Наотака Мураками, нуучча кинигэтин сакура тыллар дойдутугар атыылыыр бизнесмен ыйыталаста.
Хабаровскай, Камчатка, Амур, Чита, Благовещенскай, Магадан, Сахалин кыһаларын кытта тэҥҥэ киирсэн, биһиги кинигэлэрбит дизайнерскай оҥоһуулара тупсаҕайын, ойуута-бичигэ дьэрэкээнин, ис хоһооно баайын, дириҥин уонтан тахса анал Диплом, 9 мэтээл туоһулуур. Уһук Илин эргимтэҕэ быйыл саамай үрдүкү наҕаараада – Матвеевтар ааттарынан бэрилиннэ. Төрөөбүт дойдуларын культуратын сайдыытыгар дьоһун кылааты киллэрбит айар куттаах династияны олохтообут суруйааччы, кинигэ таһаарааччы, журналист Николай Петрович быйыл 150 сааһын туоларынан ити бириэмийэ олохтонно. Матвеевтар ааттарынан бириэмийэ дипломун «Мир Саха: народное искусство» альбом уонна «Якутский героический эпос олонхо» библиографическай ыйынньык ыллылар.
Владивосток куоракка ыытыллыбыт «Бэчээт тиэргэнэ-2015» быыстапка түмүгүнэн, «Бичик» кыһа 3 кыһыл, 3 үрүҥ, 3 боруонса мэтээллэри уонна анал Дипломнары ылла. Ол иһигэр кыһыл көмүс мэтээлинэн «Родники поэзии России», 2-4 кыл. Үөрэх-методическай босуобуйата, «Тыам тыла бараксан» оскуола оҕолоругар хрестоматия, үрүҥ көмүс мэтээлинэн «По родному краю» оҕолорго уонна ыччакка Сахабыт сирин кэрэтин арыйар суолдьут, «Мир Саха: народное искусство» альбом-кинигэ, «Помним. Гордимся. Амгинский район в годы ВОВ. 1941-1945 гг.» Улуу Кыайыы үбүлүөйүгэр анаммыт таһаарыы, боруонса мэтээлинэн «Эдьиий» кинигэ, «Путеводитель по фондам архива. Национальный архив Республики Саха (Якутия)», «Хамсыыр харамай» интерактивнай кинигэ наҕараадаланнылар. Маны таһынан, Мандар Уус «Моҕол Ураһа» фотоальбома, Н. Лугинов «По велению Чингизхана», «История Чурапчинского переселения» анал Дипломунан бэлиэтэннилэр.
Онон, биир быыстапкаҕа уһук Илин үрдүнэн «Бичик» кыһа таһаарбыт кинигэлэрэ 9 мэтээлинэн, уонтан тахса Дипломунан бэлиэтэммиттэрэ кинигэ оҥоруутугар идэтийии, сатабыл үрдүк таһымын, үлэҕэ истиҥ таптал уонна бэринии баарын өссө төгүл ырылхайдык кэрэһилээтилэр.
Марианна Тыртыкова
