Кэлэн иһэр саргылаах Саҥа Дьылы көрсө «Бичик» кыһа ааҕааччыга туһалаах саҥаттан саҥа, сонунтан сонун кинигэлэри бэлэхтииргэ дьулуһар. Бу күннэргэ үгүс төрөппүттэр оҕолоругар бэлэх көрдүү сүүрүөхтэрэ, минньигэс ас, оонньуур үчүгэй эрээри, туһата кыра. Онон, сахалыы мындырдык толкуйдуур дьоҕурдарын сайыннарар, тылларын саппааһын байытар кинигэни бэлэх оҥороруҥ ордук! Бэлэх биир күннээх эрэ буолбакка өр туһалыыр, көдьүүстээх буоларыгар кыһаныҥ!
Николай Осипов «Номох буолбут кэпсээннэр» диэн тэттик кинигэтигэр сиргэ-уокка сылдьан ордук-хоһу тыллаһар, сыыһа-халты туттар туохха тиэрдиэн сөбүн сырдатар. Маны ааҕа олорон былыргы баайдар көмүстэрин ханна кистииллэрин, Тоҕус Муостаах Тохоно ойуун олоҕун, былыт тыалын, «баайыллыбыт» куобах о.д.а. айылҕа дьикти көстүүлэрин арыйыаххыт.
«Билии холбуката» диэн саҥа серия аһыллан, «Сахалыы таба суруйуу быраабылалара» уонна «Бэргэн этиилэр» таҕыстылар. Чараас тэттик кинигэни укта сылдьан, сурукка мунаахсыйдахха, өйтөн суруйууга туттуохха сөп. Тылы таба суруйарга бу кинигэ оскуола эрэ оҕолоругар буолбакка, ийэ тылынан саҥарар, суруйар дьоҥҥо барыларыгар эргиччи туһалаах буолуо. Халыҥ тылдьыты суумкаҕар укта сылдьыбаккын, онтон бу тэттик ыйынньык хайа баҕарар кэрэ аҥаар суумкатыгар элбэх миэстэни ылбат, онон, туттарга табыгастаах. Сурук бэлиэтин, соппутуойу, тирени, хабыычыканы санаатыҥ аайы баҕарбыт сиргэр туруорбаккын, барыта быраабылалаах. Ол өйдөнөр курдук холобурданан бу кинигэҕэ эмиэ киирдэ.
Күннэтэ саҥарар саҥаҕа, сурукка хас биирдии киһи төрөөбүт тылын ойуулуур-дьүһүннүүр күүһүн төһө баһылаабыта, тылын баайа, эбэтэр тутаҕа тута көстөр. Онон, ис санааҕын сатаан этэргэ, тыл баайын сатаан туттарга «Бэргэн этиилэр» кинигэ күүс-көмө буолара саарбахтаммат. Манна 30 тиэмэнэн наарданан, кинигэҕэ классик суруйааччылартан саҕалаан, билиҥҥи кэм ааптардарын, саха биллэр-көстөр дьонун талыллыбыт бэргэн этиилэрэ киирдилэр. Холобур, саха тыла муора курдук баай. Саха омук тыла үрүйэ уутун курдук сэргэх, сир симэҕин курдук сиэдэрэй. Тылы сатаан туттуу, тылга иҥэ сылдьар күүһү булан туһаныы – үтүө сааһыт, снайпер ытар сыалын таба кыҥыырын курдук мындыр дьыала.
Сынньана таарыйа «Таайбараҥ эйгэтэ» диэн чараас кинигэҕэ ааптар Галина Прохорова сахалыы таайбараҥнара киирдилэр. Айаҥҥа иллэҥ кэми туһалаахтык атаарарга, толкуйдуур дьоҕуру сайыннарарга сканворд, кроссворд, числобус, судоку, филворд, ключворд, анаграмма о.д.а. мэйиини эрчийэр оонньуу кими да чуҥкутуо суоҕа. Таайбараҥ эппиэттэрин Play market-тан, App Store киирэн хачайдаан, «Книги Бичик» электроннай сыһыарыыга киирэн көрүҥ. Босхо эрийэн билсэр төлөпүөн: 8 800 250 1338.
«Ааҕа үөрэнэбин» сериянан кырачааннарга элбэх дьэрэкээн ойуулаах Мотрена Потапова «Сүһүөхтээн ааҕыы» кинигэтэ таҕыста. Улахан буукубалаах, сүһүөхтэргэ араарыллыбыт тиэкистээх тэттик кэпсээннэр айылҕа маанылаах кыылларын: куобах, тииҥ, саһыл, тайах, бөрө, кырса, киис, көтөр кынаттаахтар, сытыы тумустаахтар: куба, кыталык, хаас, туруйа о.д.а. уонна дьиэ кыылларын туһунан кэпсииллэр. Маны туһанан, оҕо түргэнник ааҕар дьоҕурун сайыннарыа, тылын баайын хаҥатыа, тулалыыр айылҕа тыынар тыыннааҕын кытта билсиэ. Эбээҕэ-эһээҕэ, эдэр төрөппүккэ, уһуйаан үлэһиттэригэр барыларыгар дэгиттэр наадалаах, туһалаах кинигэ.
«Бичик» кыһа саҥа тахсыбыт кинигэлэрин сэргээҥ, туһаныҥ, кэрэхсээҥ!
Марианна Тыртыкова