Төрөөбүт өрөспүүбүлүкэбит норуоттарын тыла, култуурата сайдарыгар уонна духуобунаһа үрдүүрүгэр улахан оруоллаах СӨ С.А. Новгородов аатынан «Бичик» национальнай кинигэ кыһатын производственнай салаатын салайааччытын Розалия Михайловна Федотованы, бэчээт эйгэтигэр отут сыл эҥкилэ суох бэриниилээх үлэтэ үрдүктүк сыаналанан, Арассыыйа Бэчээтин күнүн көрсө СӨ «Гражданскай килбиэн» бэлиэтинэн наҕараадаламмытынан истиҥник эҕэрдэлиибит!
Балысханнык сайдар XXI үйэни кытта тэҥҥэ хардыылаан, «Бичик» полиграфия саҥа технологиятынан таһаартыыр мультимедийнай, электроннай, дорҕоонноох, музыкалаах 3D кинигэлэр ааҕааччыны кэрэхсэтэллэригэр Розалия Михайловна тус кылааттааҕын астына бэлиэтиибит. Кини дьон-сэргэ сэҥээрэр, киэҥник туһанар сонунтан сонун бырайыактарын толкуйдаан, айан таһаарааччы үлэһиттэрбититтэн биир бастыҥнара буолар. Тэрилтэбит уопсастыбаннай олоҕун көхтөөх кыттааччыта, көҕүлээччитэ, тэрийээччитэ бу курдук кэскиллээҕи көрөн, өйүн-санаатын, билиитин-көрүүтүн, дьоҕурун биэрэн, бар дьонун ытыктабылын ылан дьаныардаахтык, үтүө суобастаахтык үлэлии-хамсыы сылдьарынан киэн туттабыт. «Бичик» кинигэ кыһатын үтүө үгэстэрин харыстаан, айымньылаахтык үлэлээн салгыы сайдыыга төһүү буолар үтүөтүн-өҥөтүн биир идэлээхтэрэ, кэллиэгэлэрэ бары улаханнык сыаналыыбыт, махтанабыт.
Ытыктабыллаах Розалия Михайловна, өссө төгүл бу кэрэ-бэлиэ түгэнинэн ис сүрэхтэн эҕэрдэлээн туран, тус олоххор, чугас дьоҥҥор дьолу-соргуну баҕарабыт. Саҥаттан саҥа ситиһии, сонунтан сонун арыйыы сүргэҕин көтөхтүн, санааҕын кынаттаатын. Ылсыбытыҥ сыыйа-баайа ыпсан, саҕалаабытыҥ сатанан, уурбутуҥ-туппутуҥ барыта биллэр-көстөр үтүө түмүктэнэн истин! Алгыс баһа сыаланнын! Дом!
СӨ С.А. Новгородов аатынан
«Бичик» национальнай кинигэ
кыһатын кэлэктиибэ
Улуу Туймаада
2016 сыл тохсунньу 13 күнэ