Күүстээх Дьөгүөр сүппүт сүөһүнү икки күн көрдөөн мэлийдэ, үһүс күнүгэр чугас соҕус баар тыымпы күөлгэ тиийбит. Күөлү эргийэ баран иһэн, күөл атаҕар оборчо бадарааннаах сиргэ ынах тоҥо сытарын булбут.
Ынаҕы икки муоһуттан ылан, муустары-хаардары оруу тардан таһаарбыт, сүкпүт уонна тойонун дьиэтигэр кэлбит. Ол-бу диэки көрбүтэ ким да суох эбит. Ынаҕын балаҕан иннигэр түһэрбит. Онтон илин уонна кэлин атахтарыттан ылан чаампы үрдүгэр элиппит уонна туох да буолбатаҕын курдук дьиэҕэ киирбит. Олус кичэҥи, кэччэгэй баай көмүлүөк оһоҕун иннигэр аргынньахтыы түһэн олох маска олорор эбит. Дьөгүөр бу киһини сөбүлээбэт үһү, ону биллэриэн баҕаран:
— Ынаҕыҥ балаҕаныҥ үрдүгэр мэччийэ сылдьар, — диэт, тахсан барбыт.
Баай оччону истэн баран олоруо дуо, таһырдьа тахсан балаҕанын үрдүн көрбүтэ ынаҕа токуччу тоҥон баран сытар. Онтон ыла баай Дьөгүөртэн дьиксинэр, куттанар буолбут.
Кэлин сааһыран баран Дьөгүөр күүһүн холоноро диэн кэпсииллэр. Тоҕус миэтэрэ уһуннаах үөл бэрэбинэни таах соһоро үһү.
Маннык уонна маныаха майгынныыр күүстээх-уохтаах, кус быһый, ураты дьоҕурдаах дьон сахаҕа аҕыйаҕа суохтар. Сэттэ буут ыйааһыннаах дьааһыгы сыыр үрдүгэр көтөҕөн таһаарар Уйбаан, сылга сүүрбэ идэһэни сиир Дорбоох, тилэҕэр диэри суһуохтаах Суһуохтуйа уо.д.а тустарынан «Дьиктилээхтэр, дьиибэлээхтэр» кинигэҕэ сэргии ааҕыҥ! Кинигэ - "Бичиккэ"!
|