«Оо, эдэр саас» диэн сериянан Татьяна Находкина «Олох оҕо оонньуута буолбатах» илиигэ тутар, айаҥҥа ааҕар дьоҕус кинигэтэ таҕыста. Суруйааччы сэһэннэригэр уонна кэпсээннэригэр бүгүҥҥү кэм дьонун сырдатар. Ким эрэ табыллыбатах тапталтан эрэйдэнэр, ким эрэ чугас киһитин алҕаһын көннөрө сатыыр, оттон сорохтор арыгы ыар содулуттан тэмтэрийэн иһэн көнөр суолга үктэнэллэр. Кинилэри биир дьулуур ситимниир – инникигэ эрэл, олоххо тардыһыы.

Степан Марков «Ийээ, бырастыы гын…» кинигэтигэр сэрии саҕана тыа сиригэр олорор дьиэ кэргэн күннээҕи үөрүүтэ-хомолтото, сүрэх истиҥ иэйиититтэн илгийэн тахсар таптала, күннээҕи олох бытархай түгэннэриттэн тиһиллэн тахсар дьол кыырпаҕа кэпсэнэр.

Сыбаайбаҕа, эбэтэр үбүлүөйгэ ыҥырдахтарына, дьэ, туох диэн эҕэрдэлиибит диэн улахан толкуйга түһэбит. Тамада тыл биэрдэҕинэ сырыы аайы доруобуйаны, дьолу-соргуну баҕарабыт диэн тоҥсоҕой курдук биири хатылаан тобугурата турар табыгаһа суох курдук. Устар ууну сомоҕолуур уус тыллаахтар киһи эрэ истэ олоруон курдук хоһоон курдук хомоҕойдук, ырыа курдук ылбаҕайдык санааларын этэллэр. Киһиэхэ эрэ барытыгар маннык дьоҕур бэриллибэт, онон «Ыл да туһан» сериянан тахсыбыт Хабырыыл Торотуойап «Эҕэрдэлэр, оонньуулар, бэргэн этиилэр» кинигэтэ дьону эҕэрдэлииргэ, бырааһынньыгы сэргэхситэргэ күүс-көмө буолуо. Манна урууга, үбүлүөйгэ ыҥырыы сурук, эҕэрдэ, остуол оонньууларын холобурдара киирдилэр. Онон, ытыска уурар дьоҕус кинигэни сиэпкитигэр укта сырыттаххытына ханна баҕарар күүтүүлээх мааны ыалдьыт буолуоххут.

Эдэр дьон сиэри-туому ситэри билбэттэр, арай, айылҕаҕа таҕыстахтарына саамай муҥутаабыта сири аһаталлар, онон бүтэр. Дьиҥэр, биһиги өбүгэлэрбит олох хайа баҕарар түгэнигэр: булка-балыкка, көлүнэр көлөҕө, миинэр минэҕэ, оҕо төрөөтөҕүнэ, киһи бардаҕына барытыгар сиэри-туому тутуһаллара. Хомус Уйбаан «Холумтан сылааһа, саха дьарыга, үгэһэ» кинигэтигэр саха үгэстэрин билиэн-көрүөн баҕалаах, ордук чуолаан, ыччакка анаан өбүгэ сиэрин-туомун билиҥҥи олоххо хайдах алтыһыннаран туттуохха сөбүн туһунан суруйар. Бу кинигэни аахпыт дьон муҥха түһэриитин, ытык сиргэ сүгүрүйүү, тылы туттуу, оҕону сахалыы эйгэҕэ иитии, иччилэргэ сыһыан уо.д.а. үгэстэр туһунан элбэҕи билиэхтэрэ.