Новости: Уһун өрөбүлгэ бу кинигэлэри кытта чуҥкуйуоххут суоҕа.

Бу сылтан ыла аны Маай бырааһынньыктарыгар барыта холбоон 9 күн өрүүр үһүбүт. Дьэ, уонча күнү супту тугунан дьарыктаныахха сөбүй? Хортуоппуй олордорго, оҕуруот буорун бэлэмнииргэ эрдэ соҕус, оттон телевизоры өрө манаан сытар салгымтыалаах баҕайы. Күндү доҕотторбутун, эһигини сэргэхситээри «Бичик» кыһа олус бэртээхэй саҥа кинигэлэри бэчээттээн таһаарда. Бу кинигэлэри кытта эһиги хаһан да чуҥкуйуоххут суоҕа диэн эрэннэрэбит.

Бырааһынньык чугаһаатаҕына, күннэтэ даҕаны дьиэ хаһаайкалара дьэ, бүгүн тугу буһарабыный, туох минньигэс аһы астаан, дьоммун үөрдэбиний диэн улахан толкуйга түһэллэр. Ыксаан интерниэти хастахха, ханна эрэ кый ыраах соҕуруу үүнэр оту-маһы муора үөнүн-көйүүрүн кытта буккуйуҥ диэбит курдук ырысыаптар саха киһитигэр дьүөрэтэ суохтар. Тымныы, тыйыс айылҕаҕа олорор дьон эт аһылыгы тото-хана сиэтэхпитинэ биирдэ астынабыт. Ол сиэринэн «Саха аныгы ыалын сандалыта» диэн астыырга судургу, өйдөнөр ырысыаптаах куукуна ыскаабыгар уура сытар, тутарга-хабарга дьоҕус көрүҥнээх бэртээхэй кинигэ таҕыста. Манна бурдук, итии ас, салат, суши, тымныы сокууска, кыһыҥҥы хаһаас ырысыаптара киирдилэр.

Элбэх буолан компаниянан бырааһынньыкка муһуннахха көрдөөх кэпсээннэри кэпсиир дьону биһиги олус диэн сэргээн, кулгаахпытын чөрөтөн олорон бэркэ сэҥээрэн истэбит. Харахпытыттан уу тахсыар диэри күлэн лаһыгыратан баран үгүстэр көрүдьүөс ис хоһоонун умнан кэбиһэбит. Онтон элбэх дьон ортотугар тыл биэрдэхтэринэ сорохтор долгуйан хара сыһаллар, нэһиилэ доруобай уонна дьоллоох буол диэн эҕэрдэлииллэр. Маннык түгэҥҥэ «Көр күлүү күлүмэ» сериянан тахсар «Көрүдьүөстэр» кинигэ көмө буолуон сөп. Бу кинигэҕэ киирбит көрдөөх кэпсээннэри ааҕан, күннээҕи түбүктэн аралдьыйыаххыт, доҕотторгутугар кэпсээн, дэлби күллэртээн, сүргэлэрин көтөҕүөххүт.

Алын кылаас оҕолоругар Григорий Федотов «Сүрэҕэ суох кусчаан туһунан остуоруйа» кинигэтигэр кус оҕото сылаас соҕуруу дойдуга көппөккө доҕотторун хабдьычааны, ботугурасчааны кытта тымныы тыйыс кыһыны хайдах туораабыттара кэпсэнэр. Манна кусчаан ыраах көтүмээри сүрэҕэ суоҕар үөрүттэн хаалан, мууһунан бүрүллүбүт эбэҕэ хам ыллара сыспытын доҕотторо уонна булчут оҕонньор дьиэ кэргэнэ быыһаабыттара. Бу остуоруйа оҕолору сүрэҕэ суох быһыы-майгы куһаҕаҥҥа тиэрдиэн сөбүн ырылхайдык өйдөтөр.

Оҕо сэттэтигэр диэри тулалыыр эйгэҕэ бастакы улахан интэриэһэ уһуктар, барыны бары тутан-хабан, амсайан, сыттаан-сытырҕалаан көрүөн баҕарар, дьонуттан: «Бу тугуй? тоҕо манныгый?» диэн күҥҥэ уончата ыйытар. Маннык кэми мүччү туппакка оҕо толкуйдуур дьоҕурун кыратыттан сайыннарыахха сөп. Итиниэхэ төрөппүттэргэ көмө быһыытынан, Любовь Заровняева «Тырыыҥка» диэн улахан кээмэйдээх кинигэтэ таҕыста. Бу кинигэ көмөтүнэн оҕо тырыыҥканы илиитигэр тутан, араас геометрическай фигураны аттаран, уларытан таһаара үөрэнэр. Манна оҕо болҕомтотун, булугас өйүн, толкуйдуур, айар дьоҕурун сайыннарыыга туһалаах сорудахтар киирдилэр.

Огдо «Буолар да эбит» сэһэн уонна кэпсээннэр киирбит кинигэтигэр дьон араас дьылҕатын оҕуруо курдук тиһэр, куруһуба оһуорун курдук ойуулуур. Олох оонньуута, оттомо, оҥкула, охсуута, оломо, оҥоһуута, олоруута, ойуута, оһуора, омуна барыта – Огдо айымньытыгар. Кинигэ төһө да халыҥ соҕус буоллар, биир тыынынан чэпчэкитик ааҕыллар, дьахтар дьоло, кини сүрэҕин туох үөрдэрэ, хомоторо кэпсэнэр.

Книжное издательство «Бичик» печатает книги не только на якутском языке, но и современных авторов, пишущих на русском языке. Одним из них является Ольга Пашкевич, которая недавно выпустила книгу с интригующим названием «Соблазн». Героями рассказов являются наши современники, представители поколения семидесятых-восьмидесятых годов. Проблемы, которые жизнь заставляет их решать, самые разные: выбор и верность любимой профессии, сложные взаимоотношения с коллегами и родными. Когда человек попадает в тупик нужно найти свой, именно свой выход.