1990-2000 сс. Ыччат, туризм, физичэскэй культура уонна спорт министирэ В.П. Ноговицын «Ыччат сайдар аартыктара» диэн кинигэтигэр пионер, хомсомуол ыһыллыбытын кэнниттэн саҥа кэм ыччатын кытта туох ханнык үлэ барбытын туһунан суруйар. Аан бастаан «Дети Азии», «Бал молодежи», «Молодая пресса», «Табык» курдук киэҥ далааһыннаах түһүлгэлэр хайдах тэриллибиттэрин, «Эдэр саас» ыччат хаһыата күн сирин көрбүтүн туһунан ааптар ахтыы аҥаардаах ыстатыйалара киирдилэр. Аргыардаах 90-ус сылларга киһи киэһэ Сэргэлээх уопсайдарын аттынан ааһыан да куттанара. Устудьуоннар ортолоругар улуустаһыы, аһыы утаҕы амсайан баран охсуһуу, сутурук күүһүн нөҥүө өттөйөн мөлтөхтөн стипендиятын былдьаан ылааһын саамай күүркэйэн турар кэмэ этэ. СГУ уопсайдарыгар бэрээдэги олохтуур туһуттан студенческай дружиналар хайдах үлэлээбиттэрин ааптар ахтар. Онон, бу кинигэ 90-ус сылларга устудьуоннаабыт, ыччаты кытта бииргэ үлэлээбит дьоҥҥо ананар. Ити кэмнээҕи көлүөнэ бииргэ алтыспыт дьонун туһунан ааҕан, уруккуну ахтан-санаан ааһыа.
«Саха суруйааччылара оҕолорго» диэн сериянан Далан кэпсээннэрэ, сэһэннэрэ, үһүйээннэрэ орто уонна улахан саастаах оҕолорго ананан киирдилэр. Сахабыт тылын сүөгэйин-сүмэтин, ойуулуур-дьүһүннүүр барҕа баайын толору иҥэриммит классик суруйааччыларбыт айымньыларын аахпыт эрэ оҕо дьиҥ сахалыы өйө-санаата уһуктар, төрөөбүт тыл кэрэ дорҕоонугар кыттыһар. Онон, төрөппүттэр оҕолорун сахалыы эйгэҕэ үөрэтиэн, иитиэн баҕалаах буоллахтарына «Саха суруйааччылара оҕолорго» диэн сериянан тахсар кинигэлэри атыылаһан, долбуурга уура сылдьан дьиэ кэргэнинэн ааҕаллара ордук.
«Бичик» кыһа аҕыйах ахсааннаах хотугу омуктар төрүт тыллара сир үрдүттэн сүппэтин туһугар кинилэр тылларынан былаан быһыытынан, кинигэ арааһын бэчээттээн таһаарар. Бу сырыыга юкагир оҕолоро төрөөбүт тылларыттан тэйбэтиннэр диэн Василий Шалугин «Находчивый Бэрбэкин, ходивший по Вселенной» диэн дьэрэкээн ойуулаах, улахан буукубаларынан суруллубут оскуола орто саастаах оҕолоругар анаан юкагир уонна нуучча тылынан остуоруйа таҕыста. Бу айымньы уһук хоту бултаан, балыктаан эрэ айахтарын ииттэн олорор төрүт омуктар итэҕэллэрин, Бэрбэкин аллараа уонна үөһээ дойдуга мүлчүргэннээх сырыыларын сырдатар.
|
