Куоракка бастакы хаар кыраһалаан түспүтэ даҕаны, ийэ сирбит харатын өссө да ыһыктыбакка, күлүмүрдэс күннээх күннэрин күрэппэккэ, кыстык хаарынан бүрүммүт халыҥ саҕынньаҕын өссө да кэтэ илик. Тыынарга салгын ыраас, чэбдик, чэпчэки. Улахан тымныы хам ыла илик. Халлаан кырыа кыһыны кэтэспиттии иһийэн турар. Маннык күннэргэ үлэбитин-үөрэхпитин үмүрүтэн баран тугу ааҕабыт?
Унньуктаах уһун кыһын сылаас дьиэҕэ олорон тугунан дьарыктаныахха сөбүй? «Иис-уус алыба» сериянан Екатерина Горохова-Чөмчүүк «Оҕуруонан оҥоһуктар» соргулаах сүбэлэрин альбом-кинигэтигэр Хаҥаластан төрүттээх уран тарбахтаах норуот маастара дьахтар симэхтэрин, сахалыы киэргэллэри, харысхаллары оҕуруонан тиһэн таһаарарга, дьэрэкээн оһуор таһаарарга үөрэтэр. Бу кинигэни тутан олорон, оҕуруонан тиһии ньымаларын, кистэлэҥнэрин билиэххит. Араас киэргэллэри, симэхтэри, бастыҥалары, илин кэбиһэрдэри оҥорон, кыргыттаргытын үөрдүөххүт, сакаас ылан, үҥкүүһүттэргэ, ырыаһыттарга тиһэн биэрэн, эбии дохуот киллэриниэххит.
Аайа «Уһаабыт сааскы түүн» кинигэҕэ үрдүкү кылаас үөрэнээччилэрэ учууталларын кытта сыһыаннара, күннээҕи үлэлэрэ-хамнастара, түбүктэрэ иһирэхтик кэпсэнэр. Улаатан эрэр оҕолор бастаан көрүүгэ төһө да дьорҕоот, сытыы-сылба, улахан киһиэхэ утары саҥарсар, төттөрүтүн этэр курдук көстүбүттэрин иһин, ис иһигэр киирдэххэ, сүрдээх өс киирбэх, чычаас-чараас, уйан дууһалаахтар, итэҕэйимтиэ-эрэнимтиэ оҕотук санаалаахтар. Бу кинигэни ааҕа олорон, алтан чуорааны кытта чугдааран ааспыт оскуолатааҕы кэмҥитин ахтан-санаан ааһыаххыт.
Оҕо кыра сааһыттан элбэҕи билэ-көрө, ааҕа үөрэннэҕинэ тылы таба суруйарга, ааҕан баран тугу өйдөөбүтүн кэпсииргэ улаханнык ыарырҕаппат, салгыы толкуйдуур, айар-тутар дьоҕура сайдар. Кыра саастаах оскуола оҕолоругар «Остуоруйа алыптаах дойдуларынан» диэн улахан буукубалаах, дьэрэкээн ойуулаах кинигэ «Бичик» маҕаһыыннарыгар атыыга таҕыста. Бу а4 саҕа улахан кээмэйдээх кинигэни тутан олорон, көтөр көбүөргэ уйдаран, оҕолор барахсаттар аан дойдуну кэрийэ сылдьан, чуваш, узбек, кытай, араб остуоруйаларын ааҕыахтара, норуот муудараһын, өркөн өйүн билиэхтэрэ.
«Үргэл» сериянан «Алгыстаах аартыгынан» диэн хомуурунньукка айар үлэ алыбыгар ылларбыт, суруйар идэ умсулҕаныгар куттарын туттарбыт, алгыстаах аартыкка үктэммит эдэр ааптардар айымньылара киирдилэр. Билиҥҥи олох үөрүүтүн-хомолтотун, дьон дьылҕатын лоскуйдарын эдэр дьон бэйэлэрин харахтарынан анааран, тэттик кэпсээннэри, хомоҕой хоһооннору ааҕааччы дьүүлүгэр таһаардылар. Суруналыыс суруйар сытыы бөрүөтүн бигэтик туппут, киэҥ эйгэҕэ биллэр Ангелина Васильева, Ульяна Захарова, Оксана Манчурина, Жанна Леонтьева о.д.а саҥа айымньыларын ааҕыаххыт.
Марианна Тыртыкова
«Бичик» саҥа кинигэлэрин ааҕыҥ-сэргээҥ, доҕор оҥостуҥ!
