Саргылаах Саҥа Дьылы көрсө «Бичик» кинигэ кыһата куоракка саха дьоно уруккуттан уутуйан олорор түөлбэтигэр, Сайсарыга, биир саамай улахан «Кэскил» оҕо уһуйааныгар «саҥарар» кинигэ сүрэхтэниитин тэрийэн ыытта. Маассабай литература редакциятын эдэр үлэһитэ Оксана Дьячковская оҕолору кытта халыҥ хордуон илиистээх кинигэ дьэрэкээн ойуутугар кыыллары сыһыаран, төгүрүгү баттаатахха, кинилэр хайдах «саҥаралларын» көрдөрдө.
«Биһиги тиэргэммит» диэн кинигэҕэ баар дьиэ таһынааҕы кыыллар: ынах, сылгы, куурусса, ыт хайдах саҥарарын истэн, оҕолор кыыллар ааттарын ким бастакынан сөпкө этэригэр күрэхтэстилэр. «Ырыых-ыраах джунглига» диэн кинигэҕэ баар кыыллар: попугай, эбисийээнэ, крокодил, эриэн үөн хайдах саҥаралларын таайдылар.
Оксана оҕолорго оонньуу арааһын оонньотон, кырачааннар сүүрэн-көтөн, ким түргэн-тарҕан, сымса-сылбырҕа туттунуулааҕар күрэхтэһэн, үөрэн-көтөн бэркэ сэргэхсийдилэр. Мөһөөччүк иһигэр банан, апельсин баарын көрбөккө эрэ илиилэринэн бигээн, джунгли олохтоохторо туох аһылыктаахтарын эттилэр.
Түмүккэ кырачааннар аптаах күлүүһү көрдөөн булбуттарын кэнниттэн, улахан сундуугу арыйан, хас биирдии оҕо Саҥа дьыллааҕы бэлэх: сакалаат уонна кинигэ булан ылан, үөрүүлэрэ өссө үрдээтэ.
Ити курдук, кырачааннар «Бичик» «саҥарар» кинигэлэрин көрөн-истэн, бэлэх ылан, бэркэ астынан-дуоһуйан, уһуйаан иитээччилэрэ өссө да кэлээриҥ дэстилэр.
Бу күннэргэ «Бичик» маҕаһыыннарыгар өссө икки саҥа кинигэлэр кэллилэр. Сонун бырайыак быһыытынан хаамыскалаах, хабылыктаах, тырыыҥкалаах кинигэ-холбуйа өбүгэлэрбит оонньууларын сөргүтэр, ыччакка тарҕатар сыаллаах оҥоһулунна. Түөрт остуол оонньуулара оҕо эт-хаан, өй-санаа өттүнэн сайдарыгар, сымса-сылбырҕа буоларыгар, толкуйдуу-ырыҥалыы үөрэнэригэр, араас түгэҥҥэ сөптөөх толкуйу тобуларыгар олук ууруохтара.
«Алыптаах Азбука» бу улахан кээмэйдээх дьикти кинигэни арыйдахха, иһигэр магниттаах интерактивнай дуоска баар, маны тэнитэн, оҕо буукубалары, сыыппаралары, остуоруйа дьоруойдарын сыһыаран, ааҕарга-суоттуурга үөрэниэ, кэпсиир, толкуйдуур дьоҕурун сайыннарыа. Магниттаах буукуба көмөтүнэн оҕо саха алпаабытын, дифтоннары үөрэтэн, тылы таба суруйуо. Бу «Алыптаах Азбука» төрөппүт, иитээччи биирдиилээн оҕону, эбэтэр бөлөҕү дьарыктыырыгар туттуллар.
Саҥа Дьылы көрсө оҕолоргутугар «саҥарар» кинигэлэри бэлэх оҥоруҥ!
Марианна ТЫРТЫКОВА
