Сахабыт сиригэр ахсынньы аам-даам тымныытын «Бичик» кыһа саҥа кинигэлэрдээх, сэргэх сонун суруйуулардаах көрсөр. Кыһыҥҥы уһун киэһэлэри эһигини чуҥкутумаары ааҕарга бэрт интэриэһинэй кэрэхсэбиллээх кинигэлэр таҕыстылар.
Антонида Иванова-Кыыдаана саргылаах Саҥа Дьылы көрсө «Аптаах түгэн» диэн бырааһынньыктааҕы сценарийдар, кэпсээннэр, остуоруйалар хомуурунньуктарын таһаарда. Уһуйаан кыра уонна орто бөлөҕүн иитээччилэрэ үлэлэригэр, оҕолорго умнуллубат бырааһынньык тэрийэргэ, остуоруйаларынан сыаҥка туруорарга, оскуолаҕа атаарарга бу көмө сценарийдары туттуохтара. Онон, «Аптаах түгэн» кинигэ уһуйааҥҥа оҕолору кытта үлэлииргэ, кырачааннары аралдьытарга күүс-көмө, сүрүн тирэх буолуоҕа.
«Таптал таабырына» сериянан Ангелина Данилова «Кэтэһиэ дуо?» диэн кинигэтэ таҕыста. Үйэлэргэ өлбөөдүйбэт суолталаах таптал туһунан ааптар тугу билбитин-истибитин олоххо буолбукка олоҕуран, уус-ураннык хоһуйан суруйар. Онон, күндү ааҕааччы, сүрэх кистэлэҥин күлүүһэ эн илиигэр баар… Арый, аах, аралдьый.
Эдэр ааптар Ульяна Захарова «Атын таптал» диэн саҥа кинигэтигэр аныгы олох араас өрүтүн, киһи киһиэхэ, тулалыыр эйгэҕэ сыһыанын, уйаҕас иэйиитин көрдөрөр кылгас кэпсээннэрэ киирдилэр. Кинигэҕэ саха ыалын араас дьылҕалаах олоҕо ааҕааччыны толкуйдатар, дьон алҕаһын, быстах санаатын хатылаабат курдук ойууланар.
Саргылаана Гольдерова – Саргы Куо «Кэм айанньыта» диэн үс кут анаарыытынан суруллубут хоһооннорун, поэмаларын, новеллаларын кинигэтэ күнү-дьылы, кэми-кэрдиини кытта тэҥҥэ олорсон, аан аартыгы арыйан, айанныырга, үйэлэри уҥуордуурга, куту-сүрү сырдатарга ыҥырар. Ааптар сахалыы олоҕун харыстаан, ый куттаах сир ийэ оҕотобун, күн куттаах аҕа таҥара сорҕотобун диэн төрүт итэҕэл төрдүгэр тиийэн, аҕа таҥара алгыһынан кэм кырдьыгын, өбүгэ быстыбат ситимин, туску тойугун хомуһуннаахтык хоһуйар.
Саха тылын сүмэтин дьиҥ чахчы иҥэриммит, сүрэҕин сылааһын дьоҥҥо түҥэтэр сайаҕас майгылаах Клара Васильева «Илгэлээх ардах» хомуурунньугар ССРС Суруналыыстарын, СӨ Суруйааччыларын сойуустарын чилиэнэ араас сылларга суруйбут айымньыларын сэргэ кини туһунан биир дойдулаахтарын истиҥ-иһирэх ахтыылара киирдилэр. Суруйааччы дойдутугар, күөх Ньурбаҕа бар дьонугар сөҕүрээбэт тапталын, ааспат-арахпат ахтылҕанын сахалыы сайаҕас тылынан сэмэйдик уонна номоҕоннук хоһуйбута ааҕааччыны кэрэхсэтиэ.
«Саха народнай суруйааччылара» сериянан Күннүк Уурастыырап «Былыргы дьыллар быыстарыгар» диэн айымньыларын 3 тома «Бичик» кыһаҕа таҕыста. Күн-дьыл ааһан, былыргы олох тыына тэйдэр-тэйэн истэҕин аайы Күннүк Уурастыырап прозата өссө ордук күндүтүйэн, ис хоһооно дириҥээтэр дириҥээн иһэргэ дылы. Бу кинигэҕэ саха норуодунай поэта урут бэчээттэнэ илик айымньылара киирдилэр, ону ааҕа олорон аныгы ааҕааччы былыргы дьыллар быыстарын сэгэтэн көрүө.
«Саха народнай суруйааччылара» сериянан Семен Данилов ааспыт үйэ 1966-1975 сылларыгар суруйбут хоһоонноро, поэмата айымньыларын 3 томугар киирдилэр. Саха народнай поэта киһи орто дойдуга кэлбит аналын, олоххо бэйэтин миэстэтин буларын хомоҕойдук хоһуйар.
Марианна Тыртыкова
