«Бичик» кинигэ кыһатын үлэһиттэрэ сылын аайы улуустарынан сылдьан Литература күннэрин ыытан, нэһилиэнньэни кытта көрсөн саҥа тахсыбыт кинигэлэри кэпсиир, билиһиннэрэр үтүө үгэстээхтэр. Ол көрсүһүүлэргэ ааҕааччылары кытта санаа атастаһан, туохха наадыйалларын, ханнык кинигэлэри ордук интэриэһиргииллэрин билсэн, үлэлэрин былаанныылларыгар туһаналлар.
Быйыл Литература сыла биллэриллибитинэн сибээстээн, кинигэ кыһата маннык көрсүһүүлэри элбэтэр былааннаах. Бу соторутааҕыта 5 киһилээх бөлөх: уус-уран, общественнай-политическай, научнай-популярнай литература редакциятын сэбиэдиссэйэ Р.П. Осипова, техническэй редактор А.Л. Кириллина, кинигэни батарар, тарҕатар сулууспа салайааччытын солбуйааччы М.А. Сухарева, менеджер В.И. Дмитриева - Мииринэй уонна Ленскэй промышленнай улуустарыгар сылдьан кэллилэр. Дьокуускайтан тэйиччи сытар алмаастаах, сир баайдаах үтүө дойдуга кинигэни кэрэхсээччи элбэҕэ сөхтөрдө, олохтоохтор саха суруйааччыларын айымньыларын нууччалыы тылбааһыгар наадыйалларын эттилэр.
Саамай ыраах сытар Сүлдьүкээр нэһилиэгин баһылыга А.А. Данилова айан ырааҕын, уустугун билиммэккэ уһук сытар сиргэ кэлэн көрсүһүү тэрийбиттэрин, ааҕааччы киэҥ эйгэтигэр аналлаах элбэх кинигэ кэһиилээх кэлбиттэрин иһин «Бичик» үлэһиттэригэр ис сүрэҕиттэн махтанна. Атыы манна саамай табыллан, дьон-сэргэ бары көтөх муҥунан кинигэлээх астынан-дуоһуйан тарҕастылар.
Мииринэйгэ Киин библиотекаҕа буолбут көрсүһүүнү оройуоннааҕы культура управлениетын начальнига О.Н. Гречаник, библиотека сэбиэдиссэйэ А. В. Никифорова, библиотекарь С. Друзьянова тэрийэн ыыттылар. Манна нэһилиэнньэ көхтөөхтүк кытынна, Арыылаахха «Туой Хайа» культура киинигэр дьон сөбүлүүр кинигэтин эмиэ хамаҕатык атыыласта.
Таас Үрэх нэһилиэгин олохтоохторо бэйэлэрэ кинигэ быыстапкатын тэрийэн бу түөлбэттэн төрүттээх ааптардар үлэлэрин туһунан кэпсээтилэр.
Салгыы Ленскэй куорат, Бэчинчэ нэһилиэгин библиотекатыгар нэһилиэнньэни кытта көрсүһүү үрдүк таһымнаахтык ааста. Салгыы «төгүрүк остуол» тула санаа атастаһыыта буолла. Уһун, киэҥ айан Чамчанан, Орто Наахаранан түмүктэннэ.
Алмаастаах, сир баайдаах дойду олохтоохторо промышленнас, география туһунан кинигэ тахсарыгар, саха төрүт үгэһин, культуратын, фольклорун, искусствотын нууччалыы тылынан таһаарарга баҕа санааларын эттилэр.
Мииринэй, Ленскэй куораттарга уонна нэһилиэк аайы «Бичик» кинигэ кыһата сылын аайы туттарар үгэһинэн «Саамай ааҕар дьиэ кэргэн» уонна «Саамай ааҕар оҕо» диэн түһүмэхтэргэ Туоһу суруктар уонна бэлэхтэр туттарылыннылар.
Ону тэҥэ тэрээһин биир сүрүн соругунан Литература сылынан библиотекалар фондаларын хаҥатарга, оҕо үөрэх тэрилтэлэригэр ааҕар, сайыннарар кинигэлэринэн көмөлөһөргө, дьиэ кэргэнинэн ааҕыыны сайыннарарга туһуламмыт «Кинигэ - үйэлээх бэлэх» диэн акциятын билиһиннэрии буолла.
Онон бу тэрээһин түмүгэр омос көрдөххө нууччалыы эйгэлээх промышленнай улуустарга саха литературатын көмүс фондатыгар киирбит суруйааччыларбыт айымньыларын тылбааһыгар наадыйар дьон элбэҕин ырылхайдык туоһулаата. Ааҕааччылар Амма Аччыгыйа «Весенняя пора», Николай Якутскай «Судьба» о.д.а кинигэлэри күүтэллэрин биллэрдилэр. Дьокуускайтан Сахабыт сирин арҕаа эҥэригэр сууккаттан ордук айаннаах ыраах сиргэ кинигэ кыайан тиийбэтинэн сибээстээн, оройуоннар кииннэригэр кинигэ маҕаһыыннара аһыллаллара наадатын ыйдылар.
Марианна Тыртыкова,
«Бичик» НКК PR менеджерэ
