Саха киһитэ былыр-былыргыттан күн бүгүнүгэр диэри Дьөһөгөй оҕотугар – сылгыга сүгүрүйэр. Ат симэҕин -- чаппарааҕы, лэпсэни, кычымы оҕуруонан быысыбайдаан тигиигэ, ону тимир, эбэтэр көмүс тордуйаларынан киэргэтэн биэрэргэ мээнэ киһи ылбычча ылсыбат үлэтэ. Хас биирдии оһуор суолтатын, ис хоһоонун эндэппэккэ билиэххэ, өҥү-дьүһүнү сатаан дьүөрэлээн, иннэнэн сиэдэрэй ойуу арааһын таһаарыахха, дьиҥ сахалыы куттаах буолуохха наада.
Уус Алдантан төрүттээх талааннаах тарбахтаах норуот маастара Людмила Жиркова төрүт үгэскэ олоҕуран, аныгы ааҕааччыны ат симэҕин оһуордаан-мандардаан тигэргэ үөрэтэр «Ат симэҕин тигии» кинигэтин сүрэхтэниитэ кулун тутар 6 күнүгэр буолан ааста. Өксөкүлээх Өлөксөй аатынан Норуоттар доҕордоһууларын дьиэтигэр норуот маастардарын быыстапкатыгар, форумҥа кэрэни кэрэхсии бэрт элбэх киһи муһунна. Педагог идэлээх Людмила Петровна элбэх хаартыскалардаах кинигэтин тутан олорон, кэрэ аҥаардар ат симэҕин оҕуруонан киэргэтэн оҥорорго, оһуор оҥкулун сукунаҕа хайдах түһэрэргэ үөрэниэхтэрэ. Маны таһынан, ааҕааччы ат симэҕэр туох-ханнык төрүт өйдөбүллээх оһуору туттуохха сөбүн билиэҕэ, иискэ туттуллар оһуордар холобурдарын көрүөҕэ. Онон, төрүт иис киһини ураты турукка киллэрэн, санааны сааһылаан, умсугутар, угуйар ураты күүһүн бу кинигэ итэҕэтиилээхтик арыйар.
Людмила Петровна тарбаҕын талаанынан, илиитин иминэн, мындыр толкуйунан оҥорон таһаарбыт үлэлэрин тигиитэ ырааһын, быысыбай эгэлгэ ньымаларын үрдүктүк баһылаабытын, иис эйгэтигэр киһи эрэ тиийбэт чыпчаалыгар тиийбитин истиэнэҕэ ыйанан турар ат симэхтэрэ ырылхайдык кэрэһилииллэр. Кини мииниллэр ат симэҕин үс кэмпилиэгин тигэн Үрүҥ Тунах ыһыахтарга бар дьон сэҥээриитин, биһирэбилин ылбыта. Бу сотору Францияҕа «Лоскуйтан тигии» быыстапкатыгар кытта бараары сылдьар. Аан бастаан саха төрүт ииһигэр ылсарбар Анна Зверева көҕүлээбитэ, кини салайар уһуйааныгар сылдьан, иис сүрүн кистэлэҥин, албаһын, ньыматын таба туттарга үөрэммитим, онон учууталбар махталым муҥура суох диэн кэпсиир.
Сандал саас бастакы бырааһынньыгынан уонна кинигэ биһирэминэн саха талба талааннаахтара Анатолий Бурнашев, Клавдия, Герман Хатылаевтар эҕэрдэлээтилэр.
Ааҕааччы киэҥ араҥатыгар ойуулаах-мандардаах ат симэҕин кэмпилиэгин арыйар кинигэни «Бичик» Национальнай кинигэ кыһата бэчээттээн таһаарбыта. Кыһа дириэктэрэ Август Егоров: «Биһиги, сахалар, Күн Дьөһөгөй айыылаахпыт, онон, норуот өйүн-санаатын өрө көтөҕөр үрдүк таһымнаах кинигэ тахсан, номнуо улахан аҥаара атыыланан бүтэн эрэр. Кинигэ практическай суолтата улахан, саҥа саҕалааччыларга тигии ньыматын хас биирдии хардыытын арыйар. Сыратын-сылбатын, бириэмэтин биэрэн туран киһи хараҕын араарбакка көрөр кэрэ симэҕин оҥорбут маастарга махтаныах тустаахпыт», -- диэн этэн туран Людмила Жирковаҕа үрүҥ көмүс сүүтүгү кытта сибэкки дьөрбөтүн бэлэхтээтэ. Итини сэргэ кинигэ күн сирин көрөрүгэр, дьоҥҥо тарҕанарыгар ыкса үлэлэспит биир идэлээхтэригэр Надежда Андросоваҕа, Сахаайа Васильеваҕа махталы кытта өйдөбүнньүк бэлэхтэри туттарда.
Людмила Петровна кинигэ тахсыытыгар, дизайнын оҥорууга кыһа үлэһиттэрэ тус олохторун умнан туран, түүн оройугар диэри бэриниилээхтик үлэлииллэрин сөҕөн-махтайан бэлиэтээтэ. Элбэх дьон, кыһа үлэһиттэрэ уонна норуот маастардара күүстэрин түмэн, ат симэҕин ымпыгын-чымпыгын быһаарар, саха киһитэ киэн туттар кинигэтэ күн сирин көрдө.
Ааптары биир дойдулаахтара, Мүрү нэһилиэгин баһылыгын солбуйааччы Лена Павлова, «Мүрү оһуордара» түмсүү салайааччыта Екатерина Бочкарева, Найахы нэһилиэгин «Симэхтэр» түмсүү салайааччыта Харитина Гоголева о.д.а. эҕэрдэлээтилэр.
Өксөкүлээх Өлөксөй аатынан Норуоттар доҕордоһууларын дьиэтин салайааччытын солбуйааччыта Розалия Колосова, Россия уонна СР искусствотын үтүөлээх деятелэ, Россия худуоһунньуктарын сойууһун чилиэнэ Зинаида Иванова-Унарова, модельер-худуоһунньук Зинаида Заболоцкая о.д.а. Людмила Жиркова кинигэтигэр үрдүкү сыанабылы биэрдилэр. «Эдэр көлүөнэ ыччаты ат симэҕин толору тигиитигэр үөрэтэн, эйигин батыһааччылар, кэрэ эйгэтин үрдэтэр үлэҕин умсугуйааччылар элбии туруохтара. Саҥаттан саҥа ситиһии, сонунтан сонун арыйыы сүргэҕин көтөҕөн, айар үлэ аартыга арылла турдун», -- диэн алгыстарын анаатылар.
Марианна Тыртыкова,
«Бичик» НКК PR менеджерэ
