«Бичик» кыһа «Кинигэ – үйэлээх бэлэх» диэн 3000 солк. үөһэ суумалаах сертификат атыылаһан ылан, библиотекаларга, оскуолаларга, тулаайахтар дьиэлэригэр кинигэ бэлэхтииргэ туһуламмыт социальнай акциятын Ил Дархан Егор Борисов бастакынан өйөөбүтэ. Бу үтүө санаалаах тэрээһиҥҥэ улуус баһылыктара, тэрилтэ салайааччылара, биирдиилээн үлэһит дьон көхтөөхтүк кыттыһан эрэллэр.
Ил Түмэн депутата Антонина Григорьева 15000 солк. суумалаах сертификаты төрөөбүт улууһун нэһилиэктэрин библиотекатын фондатын хаҥатыыга биэрэн, депутаттар ортолоруттан үтүө дьыалаҕа бастакынан кыттыста.
Дьааҥы улууһун Дулҕалаах нэһилиэгин баһылыга Виктор Стручков нэһилиэгин библиотекатыгар 10 000 солк. сертификаты биэрэн көмөлөстө. Дьокуускайга «Таатта» түмсүүтүн тэрээһинигэр салайааччы Иннокентий Андросов Таатта улууһун уонна Баайаҕа оскуолатын библиотекаларыгар 15 000 солк. суумалаах сертификаты бэлэхтээбитэ.
Бу соторутааҕыта «Бичик» уонна Литература күннэрэ Горнай улууһугар ыытыллыбытыгар нэһилиэнньэ акция туһунан истэн, саҥа ааҕар кинигэ библиотекаларынан тарҕаныан сөбүн олус сэргээтилэр. Горнай улууһун баһылыга Никита Андреев, культура управлениетын салайааччыта Тамара Кесарева сертификат ылан, библиотекаҕа бэлэхтээн, ыччат дьон ортотугар кинигэни ааҕыы элбииригэр бэйэлэрин кылааттарын киллэрдилэр. Оттон Куудуктан төрүттээх Петр Иванович Сидоров огдообото, оҕолоро аҕаларын кэриэстээн, 20 000 солк. суумалаах сертификаты Маалтааны нэһилиэгин библиотекатыгар бэлэхтээтилэр. Биир дойдулаахтарыгар кыһа биир уопуттаах сэбиэдиссэйэ, СР бэчээтин туйгуна Надежда Андросова улуустааҕы кииннэммит библиотекаҕа 10 000 солк. суумалаах сертификаты бэлэх уунна.
Мантан да атын дьон бу акцияҕа кыттыһан бэйэлэрин төрөөбүт оскуолаларын, нэһилиэктэрин библиотекаларыгар, дьонноругар-сэргэлэригэр олус суолталаах уонна үйэлээх бэлэҕи оҥордулар.
«Бичик» бары маҕаһыыннарыгар 3000 солк, 5000 солк, 10 000 солк, 25 000 солк. сертификаттар атыыланаллар. Бу үүммүт Литература сылыгар үөрэммит оскуолаҥ, төрөөбүт нэһилиэгиҥ библиотекатыгар, тулаайах оҕолорго сертификат ылан бэлэхтээн, эдэр ыччат төрөөбүт тылынан ааҕарын, уус-уран литератураны, төрүт культуратын билэрин ситиһиигэ бэйэҕит кылааккытын киллэриҥ!
Сертификат атыыласпыт, бэлэх оҥорбут үтүө санаалаах дьоҥҥо суруйааччылар уонна культура, үөрэх министиэристибэлэрин ааттарыттан Махтал сурук туттарыллар.
Бу Интернет түргэн тэтимнээх үйэтигэр төрөөбүт тылбыт, литературабыт, өбүгэ үтүө үгэстэрэ суураллан хаалбакка эдэр көлүөнэҕэ салҕанарын туһугар «Кинигэ – үйэлээх бэлэх» акцияҕа хас биирдии сахабыт дьоно көхтөөхтүк кыттыһыҥ! Сахалыы тыыннаах кинигэ бары библиотекаларга, оҕо уһуйааннарыгар, оскуолаларга, тулаайахтар интернаттарыгар, хас биирдии ыалга тарҕанарын ситиһиэҕиҥ!
Горнай улууһун баһылыга Никита Андреев, Ил Түмэн депутата Антонина Григорьева, Дьааҥы улууһун Дулҕалаах нэһилиэгин баһылыга Виктор Стручков о.д.а. үтүө холобурдарын батыһан, атын улуус, нэһилиэк баһылыктара, депутааттар дойдугут дьонугар Литература сылыгар сертификат ылан, кинигэ бэлэхтээн, төрөөбүт тылбыт, культурабыт кэнэҕэс ыччакка салҕанарын туһугар дьоһун хардыы оҥорорго тиэтэйиҥ! Быйыл Сахабыт сиригэр Урбаан сыла биллэриллибитэ, итинэн сибээстээн, атыыга-эргиэҥҥэ ситиһиилээх урбаанньыттар бу акцияҕа эмиэ көхтөөхтүк кыттыһан, кэрэни кэпсиир, үтүөнү үксэтэр саха сайдам кинигэтэ хас биирдии нэһилиэк аайы тарҕанарын, илииттэн илиигэ бэриллэрин ситиһиэҕиҥ!
Ааҕар киһи - билиилээх, билиилээх киһи - сайдыылаах, сайдыылаах киһи - ситиһиилээх! Кинигэ баар – барҕа баай, кинигэ – үйэлээх бэлэх!
Тэрийэр бөлөх
