«Бичик» Национальнай кинигэ кыһата сэрии уоттаах хонуутугар олохторун толук уурбут, тыыннарын харыһыйбакка ийэ дойдуларын өстөөх саба түһүүтүттэн босхолообут хорсун буойуннар, тыыл үлэһит дьонун сырдык ааттарын үйэтитэн, Улуу Кыайыы 70 сылыгар анаммыт 50 араас кинигэлэри таһаарда. Манна аҕаларын, эһэлэрин туһунан дьон ахтыыта, Сахабыт сириттэн Европаҕа, Берлиҥҥэ тиийэ фашистартан баттаммыт араас омук дьонун босхолоспут саллааттар хорсун быһыылара, көлөһүн күннээх оонньооботох оҕо саас, сэрии кэмин оҕолорун олохторо о.д.а сырдатылынна.
«Умнуллубат Улуу Кыайыы. Саха сирэ Аҕа дойду Улуу сэриитин сылларыгар» диэн баай ис хоһоонноох, хас биирдии улуус Кыайыы туһугар киллэрбит кылаатын кэпсиир, 2000 тахса хаартыскалаах дьоһун альбом-кинигэ тахсаат даҕаны аҕыйах хонук иһигэр бэрт хамаҕатык тарҕаммыта. Итинник улахан кээмэйдээх, дириҥ ис хоһоонноох «Город Якутск в годы Великой Отечественной Войны» П. Петров, “Помним. Гордимся. Амгинский район в годы Великой Отечественной войны 1941-1945 гг.” П. Емельянова., Е. Аманатова, «Память на века» К. Гаврильева., Н. Игнатьева уо.д.а дьоһун альбомнар таҕыстылар.
Кыайыы кинигэлэрин киэҥ эйгэҕэ билиһиннэрии биһирэмэ «Саха сиринээҕи Бэчээт тиэргэнэ-2015» IX регионнар икки ардыларынааҕы быыстапка-дьаарбаҥка иккис күнүгэр «Кружало» атыы-эргиэн киинигэр буолан ааста.
Кыһа дириэктэрэ Август Егоров:
-- Республикабыт улуустара сэрии кутаатын ортотунан ааспыт хорсун буойуннарын, күнү-түүнү, сылайары-сындалыйары аахсыбакка үлэлээбит тыыл төһүү үлэһиттэрин сырдык ааттарын үйэтитэр сыаллаах кинигэ таһааттараллара хайҕаллаах суол. Манна инники күөҥҥэ Амма уонна Бүлүү улуустара сылдьаллар. Ол курдук, быйыл Амма улууһа“Помним. Гордимся. Амгинский район в годы Великой Отечественной войны 1941-1945 гг.” диэн бэртээхэй кинигэни таһааттарбыта. Онтон Бүлүү улууһа бэрт тупсаҕай оҥоһуулаах “Память навека” альбом-кинигэни улуус ааҕааччыларыгар дьоһун бэлэх оҥордо. Биир Амма улууһа кэлиҥҥи уон сылга 150 тахса кинигэни таһааттарда. «Өйдүүбүт, киэн туттабыт, махтанабыт» сериянан элбэх кинигэ тахсан, саха саллааттарын хорсун быһыылара үйэлэргэ умнуллуо суоҕа, -- диэн эттэ уонна СӨ Тыатын хаһаайыстыбатын миниистиригэр А. Артемьевка, «Амма МТ» баһылыгын солбуйааччытыгар П.И. Емельяноваҕа, «Бүлүү МТ» баһылыгын солбуйааччытыгар В.Т. Лукиҥҥа уо.д.а. Махтал суруктары туттартаата.
Прасковья Ивановна: «Биһиги, аммалар, 185 кинигэ оҥорон таһаардыбыт. Хас биирдии нэһилиэк кинигэлээх буолла, архыып, музей үлэһиттэрин, общественноһы кытта бииргэ үлэлэһэн, улуус киэн туттар дьонун үйэтитиигэ дьоһун кылааппытын киллэрдибит диэн үөрэ саныыбыт. Манан тохтоон хаалбакка, сэрии кэмигэр сураҕа суох сүппүттэри салгыы ирдэһэн, үлэбитин салгыахпыт», -- диэн атыттарга үтүө холобур буолар үлэтин сырдатта.
Василий Тимофеевич: «Сэрии туһунан, бүлүүлэр, 8 кинигэни таһааттардыбыт. Ити кинигэлэри бэчээккэ бэлэмниир кэммитигэр «Бичик» редактордарын, худуоһунньуктарын сөхтүбүт, күн аайы киэһэ хойукка диэри хаалан үлэлииллэр, кинилэр оҥорбут учебниктара бүтүн Россия үрдүнэн бастаабыта элбэҕи кэпсиир. Билиҥҥи кинигэ оҥоһуутун, хаачыстыбатын дьон астыналлар. Онон, инникитин даҕаны, 2017 с. Бүлүүгэ «Олоҥхо ыһыаҕар», Марк Жирков 125 сылыгар кинигэ таһааттарар былааннаахпыт!» -- диэн санаатын үллэһиннэ.
Маннык кинигэлэр тахса турар буоланнар, кэнэҕэс көлүөнэ төрөөбүт нэһилиэгин, улууһун историятын билэ-көрө туруоҕа. Кыайыы кинигэлэрин биһирэмэ сэрии кэминээҕи ырыаларынан өрө көтөҕүллүүлээхтик түмүктэннэ. Быыстапка ыалдьыттара «Бичик» стендэтигэр кэлэн тахсыбыт кинигэлэри билистилэр, сэриигэ сылдьыбыт эһээлэрин хос эһээлэрин булан, сүргэлэрэ көтөҕүллэн тарҕастылар. Өрөгөйдөөх Улуу Кыайыы 70 сылыгар аналлаах сакааһынан тахсыбыт кинигэлэри, альбомнары хомуйбут, оҥорбут тэрилтэ салайааччыларыгар, ааптардарбытыгар, кинилэр спонсордарыгар улахан махталбытын биллэрэбит. Улуу буойуннар ааттара үйэлэргэ өлбөөдүйбэтин.
Марианна Тыртыкова
