Билигин энциклопедия арааһа элбэх, «Бичик» кыһа оҕолорго анаан аан маҥнайгы -- «Якутия» диэн оҕо энциклопедиятын сонун бырайыак быһыытынан таһаарда. Бу ураты кинигэ төрөөбүт дойдубут киэҥ киэлитин үгүс чаҕылхай хаартыска уонна кылгас, тэттик суруйуу нөҥүө түҥ былыргы сэлиилэртэн саҕалаан күн бүгүҥҥэ диэри тулалыыр эйгэ эҥин араас дьиктитин билиһиннэрэр. Бу дьэрэкээн ойуулаах энциклопедияны арыйан, уһук хоту ханнык динозаврдар олоро сылдьыбыттарын, саамай ыарахан ыйааһыннаах алмааһы, Балаҕан-таас диэн умуллубут вулкан ханнык улууска баарын, космос куйаарыттан сиргэ түспүт метеориттары о.д.а. билиэххит. Киһи эрэ көрө олоруох элбэх хаартыскалаах, тупсаҕай оҥоһуулаах, тэттик суруйуулаах энциклопедия оҕо төрөөбүт дойдутун туһунан билиитин хаҥатыа, араас викторина, таайбараҥ оҥорорго тирэх буолуо! Онон, оҕолоргутугар «Якутия» диэн бастакы дьэрэкээн ойуулаах энциклопедияны бэлэх оҥоруҥ, билиилэрин кэҥэтиҥ!
«Ааҕа үөрэнэбин» сериянан кырачааннарга элбэх дьэрэкээн ойуулаах Мотрена Потапова «Сүһүөхтээн ааҕыы» кинигэтэ таҕыста. Улахан буукубалаах, сүһүөхтэргэ араарыллыбыт тиэкистээх тэттик кэпсээннэр айылҕа маанылаах кыылларын: куобах, тииҥ, саһыл, тайах, бөрө, кырса, киис, көтөр кынаттаахтар, сытыы тумустаахтар: куба, кыталык, хаас, туруйа о.д.а. уонна дьиэ кыылларын туһунан кэпсииллэр. Маны туһанан, оҕо түргэнник ааҕар дьоҕурун сайыннарыа, тылын баайын хаҥатыа, тулалыыр айылҕа тыынар тыыннааҕын кытта билсиэ. Эбээҕэ-эһээҕэ, эдэр төрөппүккэ, уһуйаан үлэһиттэригэр барыларыгар дэгиттэр наадалаах, туһалаах кинигэ.
Саха норуодунай суруйааччыта Н.Е. Мординов-Амма Аччыгыйа аатырбыт «Тоҕус төгүл тоҕо» тэттик кэпсээннэрэ аныгылыы тупсаҕай оҥоһуулаах, элбэх дьэрэкээн ойуулаах кинигэнэн таҕыста. Дьиҥ олоххо оҕо уонна төрөппүт майгытыгар-сигилитигэр көстөр түктэри быһыылар сытыытык ойууланан, итэҕэтиилээхтик арыллан, хас биирдии кэпсээн ааҕааччыны толкуйдатар. Айымньылар бэйэ-бэйэҕэ болҕомтолоох буолууну, өйдөһүүнү, истиҥ сыһыаны иитэр-үөрэтэр ис хоһоонноохтор.
Марианна Тыртыкова
