СӨ С.А. Новгородов аатынан “Бичик” национальнай кинигэ кыһата суруйааччылары уонна кинигэни тарҕатааччылары сыл түмүгүнэн бастыҥнары бэлиэтиир үгэс буолбут көрсүһүүнү тэрийдэ. «Куруһаала» итии чэйдээх мааны остуолун тула кыһа үлэһиттэрэ, киэҥ ааҕааччыны сэҥээрдэр айымньылардаах ааптардар Г.Нельбисова, Т.Находкина, Е. Иринцеева, И. Ушницкай, В.Гоголев-Уйулҕан уонна кинигэни тарҕатааччылар атах тэпсэн олорон ааҕааччыга хайдах кинигэ наадатын, уустук уонна мөлтөх суоллаах-иистээх Сахабыт сирин улуустарынан кинигэни тарҕатыы боппуруоһун тула киэҥ кэпсэтиини ыыттылар. Кыһа салайааччыта А.В. Егоров ааспыт сыл түмүктэрин билиһиннэрэригэр билиҥҥи кириисис уустук кэмигэр аан дойду үрдүнэн интернет-технология, электроннай кинигэ күүскэ сайдарынан, Арассыыйаҕа кумааҕы кинигэ тахсыытын уонна тарҕатыытын уопсай ахсаана түһэ турарын, атын регионнарга 15—20 % тиийэ аччаабытын бэлиэтээтэ. Үөрүөхпүт иһин, Сахабыт сиригэр кинигэни атыылаһааччы ахсаана аҕыйаабатаҕын, ааһа баран, Литература сылынан дойду үрдүнэн ыытыллыбыт «Бастыҥ ааҕар регион” куонкуруска 86 регионтан 10 бастыҥнар ахсааннарыгар киирбитин астына бэлиэтээтэ.
“Бичик” үлэһиттэрэ киэҥ ааҕааччы болҕомтотун тута тардар, атыылыырга тупсаҕай саҥаттан саҥа бырайыактары толкуйдаан таһаарарга киэҥ өрүттээх үлэни ыыталлар. Кыһа кинигэлэрин фирменнэй маҕаһыыннарыгар атыылыыр. Маны таһынан “Книжный маркет” ХЭО (дир. Евтюшин В.С.), “Мир знаний” ХЭО (дир. Неустроева Р.Г.), “Якутский книжный дом” ХЭО (дир. Киреев В.Н.) бөдөҥ кинигэ маҕаһыыннара күүскэ өйүүллэрин, сорохторо былырыыҥҥы көрдөрүүлэрин 44% үрдэппиттэрин кыһа салайааччыта махтана бэлиэтээтэ. Кинигэни тарҕатааччы биирдиилээн дьон ортолоругар I миэстэни уруккуттан үлэлэһэр Иванова Ирина Афанасьевна (Хаҥалас), II – Эверстова Любовь Ивановна (Нам), III — Лукина Клара Константиновна (Бүлүү) ыллылар. Кыайыылаахтары таһынан үрдүк көрдөрүүлээх Ефремов Дмитрий Дмитриевич (Дьокуускай), Федотов Григорий Михайлович (Муома), Павлова Мария Ивановна (Үөһээ Бүлүү), Попова Татьяна Егоровна (Чурапчы), Кобякова Яна Васильевна (Дьокуускай), Петров Петр Данилович (Дьокуускай), 88 саастаах Захаров Егор Александрович (Мэҥэ Хаҥалас), Белолюбскай Егор Егорович (Мэҥэ Хаҥалас) “Бичик” Махтал суругунан, анал сертификатынан наҕараадаланнылар.
“Бичик” кинигэни тарҕатыыга үлэ саҥа көрүҥүн киллэрэн быйыл күһүн “Бэчээт тиэргэнэ” регионнааҕы кинигэ дьаарбаҥкатын кэмигэр 10 улуус хаһыатын редакцияларын кытта бииргэ үлэлэһэргэ дуогабар түһэрсэн турар. Төһө даҕаны кылгас кэм аастар, үтүө дьыала үчүгэй түмүктэрдээҕэ көһүннэ. Бу көрсүһүүгэ Амматтан «Амма олоҕо» хаһыат (ред.-дир. Бубякина Н.Е.), Кэбээйиттэн “Дабаан” хаһыат (ред.-дир. Эверстов В.В.), Өлөөнтөн “Сардаҥа” хаһыат (ред.-дир. Байгильдина Г.И.), Орто Халыматтан “Халыма долгуннара” (ред.-дир. Ноговицына Р.И.), салайааччылара бэйэлэринэн кэлэн көрсүһүүгэ кыттыбыттара, ыраах улуустарга олорор дьон-сэргэ хайдах кинигэлэргэ, бырайыактарга наадыйалларын аһаҕастык сырдаппыттара ордук кэрэхсэттэ, инники үлэ хайысхатын торумнуурга күүс буолара саарбаҕа суох. Олус истиҥ көрсүһүү туһунан биллиилээх суруналыыс, быйыл «Кыһыл көмүс бөрүө» хаһаайына буолбут Уйбаан Ушницкай бэргэн этиитинэн түмүктүүбүт: “Сахалыы тылынан аан дойду таһымыгар таһаарар кинигэлэргититтэн сүрэҕим манньыйар... Сахалар, кинигэни ааҕар омук быһыытынан, арааһа, Гиннес рекордун кинигэтигэр киириэхпитин сөп буолуо”. Оннук буоллар ханнык.
СӨ С.А. Новгородов аатынан “Бичик” НКК пресс-киинэ
