Муус устар 7 күнүгэр Национальнай библиотека историческай саалатыгар Россия суруйааччыларын сойууһун чилиэнэ, «Чолбон» сурунаал эппиэттиир сэкирэтээрэ, СР культуратын үтүөлээх үлэһитэ А.Е. Варламова-Айысхаана «Үргүөрдээх кэм үнүгэстэрэ» диэн романын иккис чааһын сүрэхтэниитэ буолан ааста.
Анна Егоровна учуутал идэлээх, оскуолаҕа өр сыллар усталарыгар үлэлээбитэ. Онон кини билиҥҥи оҕолору, үргүөрдээх кэм үнүгэстэрин, туох долгутарын, кинилэр тугу интэриэһиргииллэрин, туох ыра санаалаахтарын иһиттэн билэр буолан биир тыынынан ааҕыллар айымньыны суруйбутун ааҕааччылар олус сэҥээрэ, кэрэхсии көрүстүлэр.
Дириҥ ис хоһоонноох сүрүн дакылааты Гуманитарнай чинчийии институтун литература салаатын сэбиэдиссэйэ, филологическай наука кандидата Л.Н. Романова оҥордо.
Саха сирин суруйааччыларын сойууһун бэрэссэдээтэлэ Н.И. Харлампьева, «Чолбон» сурунаал үлэһитэ, суруйааччы Н.Е. Винокуров-Урсун, кинигэ редактора Р.П. Осипова, Россия суруналыыстарын чилиэнэ Е.Е. Николаева, учууталлар А.Ф. Саввинова, А.М. Васильева, М.М. Попова, оскуола үөрэнээччилэрэ Айыына Зыкова, Алеша Татаринов уо.д.а. айымньы ис хоһоонун, тылын-өһүн ырытан бэйэлэрин санааларын үллэһиннилэр. Билигин орто уонна улахан саастаах оҕолорго анаан суруйуу олус кэмчитин, сүрүннээн историческай жанрга уонна сэбиэскэй кэминээҕи олоҕу көрдөрүүгэ суруйуулар элбэхтэрин бэлиэтээн туран, Айысхаана айар үлэтигэр олус сөптөөх актуальнай хайысханы тутуһарын эттилэр. Роман төһө да сүрүннээн оскуола оҕолорун, ыччаттар олохторун, дьылҕаларын көрдөрөр курдугун иһин, хабар эйгэтэ сүрдээх киэҥ. Ол курдук билиҥҥи тыа сирин, куорат олохтоохторун күннээҕи олохторо-дьаһахтара, үлэлэрэ-хамнастара, кыһалҕалара, ситиһиилэрэ олус итэҕэтиилээхтик ойууланар. Онон кинигэ ааҕааччы бары араҥатыгар ананар.
Норуодунай поэт Наталья Ивановна Харлампьева А.Е. Варламова-Айысхаана аата саха дьахтар прозаиктара Анастасия Сыромятникова, Валентина Гаврильева кэннилэриттэн үсүһүнэн ааттанар буолуо диэн «Үргүөрдээх кэм үнүгэстэрэ» романы олус үрдүктүк сыаналаата.
Ону тэҥэ ааҕааччылар бу айымньынан спектакль туруоруллара уонна киинэ уһуллара буоллар диэн баҕа санааларын эттилэр.
Талааннаах прозаик Анна Егоровна бу улахан дьоһун айымньытын хайдах суруйбутун, үлэлээбитин сиһилии кэпсээтэ, роман икки чааһын көрөн-истэн күн сирин көрдөрбүт «Бичик» кинигэ кыһатын үлэһиттэригэр, сүрэхтэниини тэрийбит Национальнай библиотека кэлэктиибигэр, көрсүһүүгэ кэлэн кыттыыны ылбыт бары ааҕааччыларыгар ис сүрэҕиттэн махтанна.
