|
Соторутааҕыта Амур уобалаһын Благовещенскай куоратыгар Х-с төгүлүн регионнар икки ардыларынааҕы «Амурские книжные берега» кинигэни таһаарааччылар быыстапкалара буолан ааста. Тэрээһини көҕүлээччилэр Амур уобалаһын Культураҕа уонна Архыып дьыалатыгар министиэристибэтэ, Благовещенскай куорат дьаһалтата, «Амур дьаарбаҥката» САУо, «Открытое сердце» уопсастыбаннай тэрилтэ уонна «ОДЕОН» издательско-полиграфическай комплекс» ХЭТ. Быыстапкаҕа Уһук Илин араас субъектарыттан: Сахалин, Магадан уобаластарыттан, Приморскай уонна Хабаровскай кыраайдартан, Саха Республикатыттан уонна Москваттан ааптардар, кинигэ кыһалара, барыта 67 кыттааччы, тыһыынчаттан тахса полиграфическай бородууксуйа баар. Маныаха, үөрүөхпүт иһин, быыстапка чэрчитинэн ыытыллыбыт куонкуруска «Бичик» кинигэлэрэ, барыта 8 таһаарыы бастыҥнар ахсааннарыгар киирдилэр.
Ол курдук, «Бастыҥ үлэ уонна хаачыстыба» иһин «Край амурский, край дальневосточный» номинацияҕа «Якутия: детская энциклопедия», Аржакова С. К. «Якутия удивительная и загадочная», «Иллюстрированный атлас Республики Саха: новейшие карты, цифры, факты», «Мир Саха: народное искусство», оттон «Искусство издания» номинацияҕа Неустроев Б.Ф.-Мандар Уус «Моҕол ураһа», Клавдия, Герман Хатылаевтар «Төрүт дорҕоон», Иринцеева Е.С.-Огдо «Эдьиий» кинигэлэрбит кыһыл көмүс мэтээллэринэн, Канаева М.В. «Хамсыыр харамай» кинигэтэ биһирэбил дипломунан наҕараадаланнылар. Быйыл «Бичик» тэриллибитэ 90 сыллаах үбүлүөйүн көрсө араас Россия таһымнаах куонкурустарга кинигэлэрбит инники күөҥҥэ сылдьалларыттан кынаттанабыт, айар-тутар баҕабыт өссө күүһүрэр.
|
