Атырдьах ыйын 9 күнүгэр Дьокуускай куорат Курашов уул., 24 турар Профсойуустар дьиэлэрин бастакы этээһигэр «Бичик-plus» диэн саҥа кинигэ маҕаһыына Саха Өрөспүүбүлүкэтин салалтатын кыһамньытынан үөрүүлээх быһыыга-майгыга арылынна. Кинигэни тарҕатар саҥа уораҕай аһыллыытыгар СӨ Гражданскай уопсастыба институттарын сайдыытын миниистирин солбуйааччы С.А. Михайлов, СӨ Профсойуустарын Федерациятын бэрэссэдээтэлэ Н.Н. Дегтярев, СӨ Баайга-дуолга уонна сир сыһыаннаһыыларыгар министиэристибэтин олох-дьаһах хаһаайыстыбатыгар департаменын салайааччытын солбуйааччыта Б.С. Васильев, Өрөспүүбүлүкэтээҕи оҕо бибилэтиэкэтин үлэһитэ С.Н. Евдокимова, наука доктора У.А. Винокурова, суруйааччылар Н.Е. Винокуров-Урсун, Е.Г. Старостин-Байаҕантай, суруналыыстар, ааҕар дьиэ кэргэттэр, оскуола үөрэнээччилэрэ уонна түбэһэ кэлбит атыылаһааччылар уо.д.а. кыттыыны ыллылар. Кэлбит ыалдьыттарбыт бука бары уруй-айхал этэн, кинигэни тарҕатар саха эйгэҕэ саҥа ситиһиинэн эҕэрдэлээн тарҕастылар.
Саха суругун-бичигин төрүттээбит учуонай Сэмэн Новгородов аатын сүгэр «Бичик» кинигэ кыһата, быйыл 90 сыллаах үбүлүөйүн уонна бу ый 18-19 күннэригэр Ленин болуоссатыгар аан маҥнай ыытыллар «Ааҕар Саха сирэ» кинигэ бырааһынньыгын көрсө, маннык сырдык, киэҥ-куоҥ саҥа дьиэҕэ маҕаһыыннаммыта бүттүүн саха дьонун үөрдэр. 90 сыл тухары, кыһа кыараҕас иэннээх маҕаһыыннардаах этэ. Онно таһаарар кинигэлэрбит арааһын дьон-сэргэ наадалааҕын булан ыларыгар кэккэ ыарахаттар үөскүүллэрэ. Оттон бүгүн киэҥ-куоҥ атыылыыр миэстэлэнэммит, омукпут өркөн өйдөөхтөрүн санааларын иҥэриммит, норуоппут баай устуоруйатын, муудараһын, духуобунаһын мунньуммут кинигэ эгэлгэтэ атыыга таҕыста. Барыта 600-тэн тахса кинигэ арааһа, сувенирдар, көмүс оҥоһуктар, дьиэ киэргэллэрэ, туос иһиттэр долбуурдарга дьоһуннук кэчигирэстилэр. Манна ааҕааччы киирэн баран, ыксаабакка, олорон эрэ кинигэни көрөр, үөрэтэр, ааҕар уонна талар кыахтанна.
Күн бүгүн «Бичик« үтүө үгэстэри салҕаан, Сахабыт сирин норуоттарын литературата, култуурата, науката, үөрэҕириитэ сайдарын туһугар күүскэ ылсан үлэлиир.
Саха сирин норуоттарын тылынан кинигэ кэскиллээх сарсыҥҥытыгар, киэҥ аартыгар, эрэллээх ааҕааччыларыгар ааммытын арыйдахпыт буолуохтун! Онон, күндү куорат олохтоохторо, ыалдьыттара, оҕолорун оскуолаҕа тэрийэр төрөппүттэр, учууталлар, атырдьах ыйын 9-14 күннэригэр (өрөбүлэ суох үлэлиир) саҥа маҕаһыын арыллыбыт үөрүүтүгэр, кинигэлэрбитин сэргээччилэргэ 20% чэпчэтиини биллэрэбит.
